Fáðu þér æfingarfélaga

Höfundur:   0 athugasemdir

Eins dásamlegt og það er nú að stunda reglubundna og fjölbreytta líkamsrækt koma samt þær stundir að fletta þarf upp öllu tiltæku úr afsökunarbókinni.

Ég hef bara engan tíma.
Æ byrja í næstu viku,
…..nei annars höfum það næstu mánaðarmót.

Ýmsar aðrar sannfæringar fylgja oft í kjölfarið á borð við,

tja ég leyfi mér nú tvöfaldan hamborgara, sósu og gos úr því ég er að fara að koma mér af stað í ræktina á morgun, á það skilið.
Á líka skilið að detta í það um næstu helgi, svona í síðasta sinn fram að átaki.

Allt er þetta að mínu mati til bölvunar. Hófsemin er þó vissulega best og um að gera að leyfa sér eitt og annað en þá sem verðlaun fyrir góða ástundun eða fyrir að ná tilsettum markmiðum.

En til að allt gangi upp getur verið bráðsniðugt að finna sér æfingafélaga. Einhvern sem styður við bakið á manni. Hlustar ekki á afsakanir og er á allan hátt hvetjandi. Ég mæli allavega með því.

Þetta snýst að sjálfsögðu allt um að þróa með sér heilbrigðan lífsstíl.

Að gera hreyfingu og hollt mataræði sem mikilvægan hluta af lífi hvers og eins, það er algerlega málið!

Leitið og þér munið finna

Hver og einn þarf að finna eitthvað við sitt hæfi. Sumum hentar að hafa æfingafélaga, öðrum að æfa einir og svo eru margar aðrar leiðir færar til að ná árangri. Hægt er að skella sér á einkaþjálfun, skrá sig á námskeið eða mæta á byrjendanámskeið í badminton svo fátt eitt sé nefnt. Svo er auðvitað hægt að kaupa sér æfingafélaga.

Hér er ég að vísa í æfingafélaga á við Polar eða Garmin.

Fjölmargar aðrar tegundir eru til, þar með talið snjallsímar, hægt er að fá púlsband við helstu snjallsíma, síðan er bara að sækja heppilega viðbót í símann og málið er dautt.

Þetta getur haldið fólki rækilega við efnið. Ef við tökum Polar sem dæmi þá er hægt að búa til æfingar að fara eftir með græjunni. Tækið sýnir lægsta, hæsta og meðalpúls við hverja æfingu sem og fjölda hitaeininga sem líkaminn notaði. Einnig er hægt að gera þolpróf með sumum týpum. Þá er hægt að stilla hvort um brennslu eða þolþjálfun er að ræða og þá lætur tækið vita hvort þurfti að bæta í eða hægja á.

Fólk þarf mismikið aðhald. Það getur verið sniðugt fyrir þá sem þurfa mikið aðhald (og reyndar fyrir alla að sjá það svart á hvítu) að prófa að ganga með púlsband í einn sólarhring og sjá hve mikil brennsla átti sér stað. Á sama tíma er hægt að skrá niður allt sem borðað er t.d á Myfitnesspal.com.

Þessar tölur eru síðan bornar saman til að sjá hvort verið sé að innbirgða of mikið af hitaeiningum á móti brennslunni eða öfugt.

Gangi ykkur allt í haginn!

Víðir Þór Þrastarson

Víðir Þór er íþrótta- og heilsufræðingur frá HÍ og heilsunuddari frá Nuddskóla Íslands.

Segðu þína skoðun...


Provided by water damage columbus