fbpx

Fiber Fueled: Biblían um magaflóruna

Höfundur:   0 athugasemdir

Dr. Bulsiewicz gaf út bókina Fiber Fueled á síðasta ári en hann er sérfræðingur í meltingarfærasjúkdómum. Bókin fjallar um magaflóru okkar, mikilvægi hennar og hvernig hægt er að hámarka heilbrigði hennar og heilsu okkar um leið. Mikilvægi magaflóru okkar verður seint ofmetið, jafnvel er talað um að hún sé okkar annar heili.

Dr. Bulsiewicz, eða dr. B eins og hann er gjarnan kallaður, er bandarískur læknir með stórbrotna ferilskrá. Hann skrifaði bókina eftir eigin reynslu og reynslu sjúklinga í hans umsjá.

Ég mun rita um efni þessarar bókar í nokkrum greinum, en innihald hennar er of mikilvægt og vægi hennar of mikið til að hægt sé að ná utan um það í einni grein.

Meðalmanneskjan lætur ofan í sig um 36.000 kg af mat um ævina. Staðreyndin er því sú að það sem við látum ofan í okkur hefur úrslitaáhrif á heilsu okkar.

Þetta eru góðar fréttir, því þetta þýðir jafnframt að við stjórnum því hversu heilsuhraust við erum, og það er aldrei of seint að byrja að snúa heilsu okkar til batnaðar.

Maga okkar inniheldur 39 trilljón örverur en fjöldi þeirra er um 10x fleiri en fjöldi frumna í líkama okkar. Flestar þessara örvera eru bakteríur, og fundist hafa milli 300-1000+ mismunandi tegundir baktería í þarmaflóru okkar.

Fjölbreytni í hverskonar lífríki er nauðsynlegt til að gæta jafnvægis.

Þetta á einnig við um lífríki magaflóru okkar. Þær tegundir örvera sem við viljum styrkja og fjölga hafa undraverðan lækningamátt okkur til handa. Örverurnar búa í smáþörmum okkar og hjálpa okkur að brjóta fæðu okkar niður í smærri einingar. Fæða okkar er einnig fæða þeirra. Ekki nærast allar örverur á sömu fæðutegundum. Þess vegna skiptir öllu máli hvað það er sem við látum ofan í okkur og einnig að fjölbreytni gætir í fæðuvali okkar. Ef við tökum varanlega út einhverja fæðutegund, munu örverurnar sem nærast á þeirri fæðutegund fara úr þarmaflórunni. Örverur skipta sér svo hratt að það sem við látum ofan í okkur á 24 klst hefur áhrif á 50 kynslóðir örvera.

Trefjar eru næring góðu örveruflórunnar

Þess vegna skiptir miklu máli hvernig við nærum okkur, því það sem fer ofan í okkur nærir mismunandi tegundir örvera. Og það sem nærir góðu örverurnar, þær sem við viljum halda og styrkja í magaflóru okkar, eru trefjar.

Berglind Rúnarsdóttir

Ég heiti Berglind Rúnarsdóttir og er jógakennari með BS gráðu í matvælafræði, kafari, fríkafari, ferðalangur, móðir, stjúpmóðir og kærasta. Ég hef ástundað jóga, hugleiðslu og öndunaræfingar í yfir 20 ár og snúast áhugamálin yfirleitt um að hámarka heilsu og vellíðan, dansa og að busla í vatni við hvert tækifæri. Árið 2006 varði ég þremur mánuðum við köfun við strendur Thailands til að ná PADI köfunarmeistararéttindum (e. Dive Master). Það var þá sem ég gerði mér grein fyrir mikilvægi meðvitaðrar öndunar og að viðhalda ró í krefjandi aðstæðum.

Ég hef tekið þátt í IFBB módel fitness þar sem ég vann í mínum flokki, æft Roller Derby með íslenska landsliðinu um árabil, gegnt hlutverki lukkudýrs og ferðast víðsvegar um heiminn eins míns líðs, bæði innan og utan Evrópu. Þetta hef ég gert til að fá þær upplifanir sem ég vildi, til að skora á sjálfa mig og til að þjálfa með mér hæfni til að dvelja utan þægindarammans.

Ég leitast sífellt við að bæta við mig þekkingu í næringarfræði, öndunartækni (Wim Hof, Buteyko, Soma og DMT öndunaræfingum) og hverskyns lífsleikni. Ég brenn fyrir að hjálpa fólki að ná árangri í sínu lífi og sigrast á sínum vandamálum.

Vefsíðan mín brglndyoga.is er komin í loftið og er hægt að óska eftir ráðgjöf á brglndyoga@gmail.com

Segðu þína skoðun...