Íþróttanudd

Höfundur:   0 athugasemdir

Nudd almennt séð er ein elsta og virtasta meðhöndlun sem fyrirfinnst. Elstu heimildir um nudd ná allt til ársins 2330 fyrir Krist en þær koma frá Kína og Indlandi. Lengi vel í Kína voru aðeins útskrifaðir læknar sem gátu farið í framhaldsnám í nuddi. Í dag hins vegar er fjöldi fólks að kalla sig nuddara án þess að hafa nokkra menntun að baki. Nuddnám á Íslandi er mjög metnaðarfullt og spannar alls 4 ár og er kennt við heilbrigðisskóla Fjölbrautaskólans við Ármúla. Meðal greina sem kenndar eru við skólann er íþróttanudd.

Íþróttanudd er á margan hátt eins og klassískt nudd nema sniðið meira að þörfum íþróttamanna. Mikil áhersla er lögð á upptök og festur vöðva og alla jafna er nuddað talsvert djúpt. Í upphafi er það svæði sem vinna á með hitað vel upp með hröðum taktföstum strokum. Síðan er hægt á og farið djúpt og vel í vöðvana, losað um hnúta og um leið eykst blóðflæðið og vöðvarnir mýkjast. Góður íþróttanuddari notar fjölmargar aðferðir í sinni vinnu. En fyrir utan venjulegar strokur með fingrum, þykkhönd og framhandlegg má nefna tryggerpunktaaðferð, bank, víbring og tog.

Mikilvægt er að nuddþeginn geti andað í gegnum strokurnar og þannig hleypt nuddaranum í að beita þrýsting djúpt inn í vöðvana. Ef nuddað er of djúpt er hætt við að nuddþeginn spennist allur upp og spyrni ómeðvitað á móti, með því næst ekki sá árangur sem lagt var upp með.

Misjafnt er eftir íþróttanuddurum hvernig tíma þeir bjóða upp á. Sumir nudda allan líkamann og fara þá fremur hratt yfir en reyna þá að losa sem mest á þeim tíma sem þeir hafa en algengasti tíminn er 60 mínútur. Aðrir leggja áherslu á tiltekin svæði, t.d bara bak eða bara fætur og eru þá allan tímann að vinna á því.

Gott er að fara reglulega í íþróttanudd ef hægt er að koma því við. Helst einu sinni í viku. Einnig er hægt að verðlauna sig ef svo má að orði komast með því að panta sér tíma í lok hvers mánaðar. Að setja sér einhver markmið fyrir hvern mánuð og gera svo vel við sig með því að fara í gott íþróttanudd. Þess á milli er hægt að nudda sjálfan sig með foam rúllu annað slagið eftir góða æfingu. En sem sagt íþróttanudd er frábær leið til að losa um spennu almennt, eitthvað sem allir ættu að prófa og nota sem hluta af sínu ferli við að komast í gott form og ná jafnvægi á líkama og sál.

Fjölmargir heilsunuddarar sérhæfa sig í íþróttanuddi en upplýsingar um alla heilsunuddara má finna á heimasíðu heilsunuddara: heilsunudd.is

Nuddkveðja, Víðir Þór
Íþróttafræðingur og heilsunuddari

Víðir Þór Þrastarson

Víðir Þór er íþrótta- og heilsufræðingur frá HÍ og heilsunuddari frá Nuddskóla Íslands.

Segðu þína skoðun...


Provided by water damage columbus